ភ្នំពេញ៖ ក្រសួងការបរទេសចិនតាមរយៈអ្នកនាំពាក្យរបស់ខ្លួនលោក Wang Wenbin បានប្រកាសគាំទ្រកម្ពុជាក្នុងការការពារអធិបតេយ្យជាតិនិងសេចក្តីថ្លៃថ្នូរនៃជាតិ នឹងគាំទ្រឈរជាមួយប្រជាជនកម្ពុជាជារៀងរហូត ប្រឆាំងនឹងការប៉ុនប៉ងណាសមួយដែលចង់បំផ្លាញប្រទេសកម្ពជា។

ឆ្លើយទៅនឹងសំណួរអ្នកសារព័ត៌មានដែលបានសួរថា សហរដ្ឋអាមេរិកនឹងបន្ថែមវិធានការលើការកំណត់ការនាំចេញចូលរបស់ខ្លួនជាមួយកម្ពុជា និងហាមឃាត់ការលក់អាវុធនិងសម្ភារៈយោធាដល់កម្ពុជាក្រោមហេតុផលកម្ពុជារំលោភបំពានសិទ្ធិមនុស្ស ពុករលួយ និងបង្កើនវត្តមានទ័ពចិននៅកម្ពុជា។

លោក Wang Wenbin បានឆ្លើយតបថា៖ «នេះគឺជាទង្វើដែលប្រើអំណាចគៀបសង្កត់លើអ្នកដទៃយ៉ាងពិតប្រាកដនិងច្បាស់លាស់ នេះបានល្មើសនឹងក្រមប្រតិបត្តិមូលដ្ឋាននៃទំនាក់ទំនងអន្តរជាតិផងដែរ។ ភាគីចិនប្រឆាំងជាដាច់ខាតចំពោះទង្វើបែបនេះ។ ចិននិងកម្ពុជា គឺជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ ជាមិត្តដែកថែបនិងជាសហគមន៍វាសនារួម។ ចំណងមិត្តភាពជាប្រពៃណីនៃប្រទេសទាំងពីរឆ្លងកាត់ការសាកល្បងតាមគ្រប់រូបភាព ធ្វើឱ្យកាន់តែរឹងមាំមិនអាចបំបែកបាន។ គំនិតអាក្រក់ប៉ុនប៉ងរបស់អាមេរិកលើទំនាក់ទំនងចិននិងកម្ពុជានឹងទទួលបរាជ័យ» ។

ទាក់ទងនឹងបញ្ហានេះនាយករដ្ឋមន្ត្រីកម្ពុជា សម្ដេចតេជោ ហ៊ុន សែន នៅរសៀលនេះក៏បានបញ្ជាដល់អង្គភាពប្រដាប់អាវុធទាំងអស់ធ្វើការត្រួតពិនិត្យនិងប្រមូលមកវិញជាបន្ទាន់នូវអាវុធ និងសម្ភារៈយោធាអាមេរិកដែលមាននៅកម្ពុជា យកទៅទុកក្នុងឃ្លាំង ឬកំទេចចោលតាមការជាក់ស្ដែង។ សម្ដេចថា អាវុធអាមេរិកជាអាវុធរបស់អ្នកចាញ់ និងជាអាវុធដែលធ្វើឱ្យកម្ពុជាជាប់បំណុលខ្មៅរហូតមកដល់ពេលបច្ចុប្បន្ន។

សម្ដេចបានលើកឡើងបន្ថែមថា ការសម្រេចរបស់សម្ដេចកាលពីឆ្នាំ១៩៩៤ ដែលមិនទិញផ្លាស់ប្ដូរប្រព័ន្ធអាវុធកម្ពុជាទៅទិញអាវុធអាមេរិកគឺពិតជាត្រឹមត្រូវ។

នៅមួយរយៈចុងក្រោយនេះ ទំនាក់ទំនងកម្ពុជា-អាមេរិក ត្រូវបានគេមើលឃើញថាកំពុងកើនកម្ពៅបន្ដិចម្ដង បន្ទាប់ពីកម្ពុជាព្យាយាមអភិវឌ្ឍន៍មូលដ្ឋានទ័ពសមុទ្ររាមក្នុងខេត្តព្រះសីហនុរបស់កម្ពុជា ហើយត្រូវបានអាមេរិកចោទប្រកាន់ថាកំពុងផ្ដល់ឱ្យចិនកសាងមូលដ្ឋានទ័ពនៅទីនោះ ទោះបីកម្ពុជាខំបង្ហាញនូវភាពស្មោះត្រង់ និងបើកបង្ហាញជាច្រើនលើកច្រើនដងក៏ដោយ។ សកម្មភាពរបស់អាមេរិកនេះត្រូវបានគេចាត់ទុកជាសកម្មភាពរករឿង និងជ្រែតជ្រែកកិច្ចការផ្ទៃក្នុងរបស់រដ្ឋអធិបតេយ្យមួយដែលមិនអាចទទួលយកបាន៕